Këshilli i Ministrave, në mbledhjen e zhvilluar këtë të enjte, miratoi 15 vendime të rëndësishme që prekin fusha të ndryshme, nga energjia dhe infrastruktura, te administrata publike dhe mbrojtja civile.
Një ndër vendimet kryesore ishte miratimi i “Udhërrëfyesit për arritjen e Objektivave të Zhvillimit të Qëndrueshëm 2026–2030”. Ky dokument strategjik përcakton prioritetet dhe masat që do të drejtojnë zhvillimin e vendit gjatë pesë viteve të ardhshme, me fokus te rritja ekonomike, mbrojtja sociale, mjedisi dhe forcimi i institucioneve.
Qeveria miratoi gjithashtu ndërtimin e dy centraleve fotovoltaike në qarkun e Fierit. Projekti i parë do të realizohet nga shoqëria “FOS SOLAR” në fshatin Povelçë, me kapacitet 40 MW, ndërsa projekti i dytë nga “EURON SOLAR-PV” në zonën Fushë–Povelçë, me kapacitet 100 MW. Të dy projektet nuk janë objekt koncesioni dhe nuk përfitojnë mbështetje financiare nga shteti. Afati i ndërtimit është 36 muaj, ndërsa operimi do të zgjasë 49 vjet.
Ministria e Infrastrukturës dhe Energjisë, së bashku me AKBN-në, do të monitorojnë zbatimin e projekteve çdo tre muaj. Shoqëritë investuese do të kenë detyrime të qarta ligjore dhe financiare, përfshirë respektimin e kushteve mjedisore dhe pagesën e kontributeve për shtetin.
Në mbledhje u miratua edhe lista e projekteve që do të financohen gjatë vitit 2026 nga Fondi për Parandalimin dhe Menaxhimin e Fatkeqësive Natyrore. Projektet synojnë përmirësimin e infrastrukturës dhe kapaciteteve për përballimin e emergjencave në pushtetin vendor.
Një tjetër vendim lidhet me shpalljen e disa zonave në bashkitë Fier dhe Gjirokastër si zona me përparësi për zhvillimin e ekonomisë malore. Përmes këtij statusi synohet nxitja e investimeve ekonomike, industriale dhe turistike në këto territore.
Qeveria përcaktoi gjithashtu rregulla të reja për njësitë përgjegjëse për sinjalizimin dhe mbrojtjen e sinjalizuesve në institucionet publike. Çdo institucion do të ketë një strukturë të posaçme që do të trajtojë raportimet për korrupsion dhe shkelje ligjore, duke garantuar konfidencialitetin dhe shmangien e konfliktit të interesit.
Një tjetër ndryshim prek administratën publike, ku u miratua trajtim i veçantë financiar për punonjësit e projektit “Smart City”, që lidhet me sistemin e kamerave nën administrimin e Policisë së Shtetit. Pagat dhe shtesat për stafin teknik do të financohen nga buxheti i Policisë së Shtetit për vitin 2026.
Në sektorin e infrastrukturës, qeveria miratoi shpronësimin e pronarëve të prekur nga projekti për zgjerimin e superstradës Tiranë–Durrës (Loti 1). Vlera totale e kompensimit arrin rreth 25.1 milionë lekë. Ndërkohë, u miratua edhe kompensimi për pronat e prekura nga projekti “Baza Ajrore Farkë”, me një fond prej rreth 18.3 milionë lekësh.
Po ashtu, Këshilli i Ministrave vendosi zgjatjen deri më 31 dhjetor 2029 të pjesëmarrjes së një toge të Forcave të Armatosura shqiptare në operacionin ushtarak të NATO-s në Letoni. Kontingjenti do të vijojë misionin me rotacion çdo gjashtë muaj, ndërsa financimi do të mbulohet nga buxheti i Ministrisë së Mbrojtjes.