SHBA forcon bashkëpunimin me rajonin, ekspertët amerikanë trajnojnë zyrtarët kundër krimit financiar
Shtetet e Bashkuara të Amerikës kanë intensifikuar mbështetjen për luftën kundër krimit të organizuar dhe pastrimit të parave në Shqipëri, Kosovë dhe Maqedoninë e Veriut përmes një programi të avancuar trajnimi të dedikuar hetimeve financiare.
Ambasada e SHBA-së në Tiranë njoftoi se autoritetet amerikane të zbatimit të ligjit po bashkëpunojnë ngushtë me institucionet e tre vendeve për të rritur kapacitetet profesionale në identifikimin dhe hetimin e rrjeteve kriminale që përfitojnë nga aktivitetet e paligjshme.
Programi zhvillohet nga Zyra për Zhvillimin, Ndihmën dhe Trajnimin e Prokurorisë Jashtë Vendit (OPDAT) pranë Departamentit të Drejtësisë së SHBA-së dhe financohet nga Byroja Kundër Terrorizmit e Departamentit të Shtetit.
Në fokus të trajnimit kanë qenë teknikat moderne të hetimit financiar, të prezantuara nga ekspertë të Hetimit Kriminal të IRS-së, të cilët kanë ndarë përvojën e tyre në zbulimin e aktiviteteve të paligjshme, mbledhjen e provave për procedime penale dhe sekuestrimin e pasurive të krijuara nga veprimtari kriminale.
Sipas Ambasadës së SHBA-së, hetimet financiare mbeten një nga instrumentet më të fuqishme për të goditur grupet kriminale, pasi synojnë jo vetëm autorët e krimeve, por edhe burimet financiare që mbështesin aktivitetin e tyre.
Ky bashkëpunim konsiderohet një hap i rëndësishëm për forcimin e kapaciteteve rajonale në luftën kundër krimit të organizuar dhe financimit të aktiviteteve të paligjshme.