Irani dhe aleatët e tij po shqyrtojnë mundësinë e aktivizimit të “fronteve të tjera”, përfshirë Ngushticën Bab al-Mandab, si kundërpërgjigje ndaj sulmeve izraelite në Liban. Lajmi është raportuar nga mediat iraniane dhe është pasqyruar edhe nga CNN.
Një mbyllje e mundshme e kësaj rruge strategjike detare do të kishte pasoja të mëdha për tregtinë botërore dhe do të ushtronte presion të ri mbi tregjet energjetike. Menjëherë pas raportimeve, çmimet e naftës shënuan rritje të ndjeshme.
E vendosur në skajin jugor të Detit të Kuq, Ngushtica Bab al-Mandab përbën një korridor jetik që lidh Europën me Azinë përmes Kanalit të Suezit. Me një gjerësi prej vetëm 29 kilometrash në pikën më të ngushtë, ajo konsiderohet një nga nyjet më të rëndësishme të transportit detar global.
Kjo zonë ka qenë edhe më parë në qendër të tensioneve. Në fund të vitit 2023, rebelët Huthi të Jemenit, të mbështetur nga Irani, nisën sulme ndaj anijeve tregtare që kalonin nëpër ngushticë, duke deklaruar se vepronin në shenjë hakmarrjeje për luftën e Izraelit në Gaza. Si pasojë, shumë kompani detare u detyruan të devijonin itineraret e tyre, duke rritur kostot e transportit, sigurimeve dhe karburantit.
Sipas të dhënave të industrisë, rreth 15% e tregtisë detare globale kalon përmes Bab al-Mandab. Ndërprerjet e mëparshme të trafikut detar gjatë viteve 2023–2025 vlerësohet se i kanë kushtuar ekonomisë globale afërsisht 20 miliardë dollarë në vit.
Megjithëse lufta në rajon ka vijuar, ngushtica ka mbetur kryesisht e hapur, duke garantuar një korridor të rëndësishëm eksporti për Arabinë Saudite, eksportuesin më të madh në botë të naftës bruto.
Deri tani, lëvizja Huthi nuk ka reaguar zyrtarisht ndaj raportimeve iraniane. Megjithatë, në mars, zëvendësministri i Informacionit në administratën Huthi, Mohammed Mansour, deklaroi për CNN se mbyllja e Bab al-Mandab mbetet një opsion i realizueshëm dhe se pasojat e një veprimi të tillë do t’i ndienin kundërshtarët e tyre amerikanë dhe izraelitë.