Bordi i Transparencës publikon çmimet e reja të karburanteve, në fuqi nga sot
Bordi i Transparencës ka miratuar çmimet tavan të karburanteve në Shqipëri, të cilat hynë në fuqi më 10 qershor 2026, në orën 14:00, dhe do të mbeten të vlefshme deri në mbledhjen e ardhshme.
Sipas vendimit, nafta (gazoili) do të tregtohet me çmim maksimal prej 188 lekësh për litër në pakicë dhe 176 lekësh për litër në shumicë. Ndërkohë, benzina do të shitet deri në 171 lekë për litër në pakicë dhe 159 lekë për litër në shumicë.
Autoritetet kanë theksuar se të gjithë operatorët e tregtimit të karburanteve janë të detyruar të zbatojnë këto çmime. Në rast të shkeljeve, parashikohen masa ndëshkuese, deri në pezullimin e aktivitetit.
Bordi sqaroi gjithashtu se, bazuar në metodologjinë e llogaritjes së çmimeve dhe në Aktin Normativ nr. 1, datë 3 prill 2026, çmimet aktuale mbeten nën kufijtë e përcaktuar për uljen e akcizës. Për këtë arsye, akciza për karburantet do të vazhdojë të aplikohet në nivelin e plotë, 100%.
Sa i përket gazoilit për peshkim, çmimi i përcaktuar është 92 lekë për litër, në përputhje me përjashtimet fiskale të parashikuara nga legjislacioni në fuqi për sektorin e peshkimit.
Institucionet përgjegjëse kanë deklaruar se do të vijojnë monitorimin e tregut për të mbrojtur interesat e konsumatorëve dhe për të garantuar konkurrencë të ndershme.