Të paktën 12 persona kanë humbur jetën dhe nëntë të tjerë janë plagosur si pasojë e një sulmi të armatosur që ndodhi të martën në mbrëmje në vendbanimin informal Cleveland, në lindje të Johanesburgut, bëri të ditur policia e Afrikës së Jugut.
Sipas autoriteteve, tetë burra dhe tre gra u gjetën pa shenja jete në vendin e ngjarjes, ndërsa një burrë tjetër ndërroi jetë më vonë në spital për shkak të plagëve të marra. Të plagosurit po trajtohen në qendrat mjekësore.
Policia njoftoi se autorët e dyshuar hynë në zonë nga dy hyrje të ndryshme dhe qëlluan në disa pika të vendbanimit përpara se të largoheshin me automjetin e tyre.
Shkaqet dhe motivet e sulmit nuk janë bërë ende të ditura, ndërsa deri më tani nuk raportohet për të arrestuar.
Forcat e rendit kanë nisur një operacion të gjerë për identifikimin dhe kapjen e autorëve, duke u bërë thirrje qytetarëve që posedojnë informacione të ndihmojnë hetimet.
