Edi Rama ka deklaruar përpara drejtuesve të Partisë Socialiste se mbështetja për partinë është rreth 49% e votuesve. Sipas burimeve të ndryshme, kjo shifër është paraqitur si një tregues stabiliteti për pozicionin e forcës politike në pushtet, pavarësisht luhatjeve të mundshme elektorale.
Sipas raportimeve, kryeministri e ka bërë këtë deklaratë gjatë një diskutimi të brendshëm me drejtues politikë të qarqeve dhe anëtarë të kabinetit qeveritar, ku është analizuar situata politike në vend, protestat e fundit dhe puna e strukturave të Partisë Socialiste në terren.
Në takim, i zhvilluar me dyer të mbyllura në selinë e Partisë Socialiste, Rama ka theksuar rëndësinë e kontaktit të drejtpërdrejtë me qytetarët. Ai ka kërkuar nga deputetët dhe drejtuesit lokalë që të jenë më aktivë në terren dhe më të angazhuar me problematikat e komuniteteve, përfshirë infrastrukturën dhe shërbimet publike.
Gjithashtu, ai ka nënvizuar se zyrat e deputetëve duhet të jenë funksionale dhe të hapura për qytetarët, në mënyrë që shqetësimet e tyre të adresohen më shpejt. Sipas tij, shtimi i takimeve në terren mbetet një element i rëndësishëm për forcimin e komunikimit me bazën.
Pas përfundimit të mbledhjes, kryeministri Edi Rama u pa duke u larguar nga selia e Partisë Socialiste së bashku me kreun e grupit parlamentar Taulant Balla. Ai nuk dha deklarata për mediat, duke u mjaftuar me një përshëndetje të shkurtër para se të vijonte me axhendën e tij.
Be First to Comment