Shaqiri mes legjendave të futbollit, shqiptari renditet në elitën e golashënuesve të turneve madhore
Të realizosh gol në një Kampionat Evropian apo Kupë Bote është një arritje e madhe për çdo futbollist. Por të lësh gjurmë në disa turne madhorë radhazi është privilegj i rezervuar vetëm për lojtarët më të mëdhenj të historisë.
Në krye të kësaj liste qëndron Cristiano Ronaldo, i cili ka shënuar në plot 11 turne të ndryshëm madhorë, mes Kampionateve Evropiane dhe Kupave të Botës. Një rekord i jashtëzakonshëm që e vendos portugezin në një kategori më vete.
Megjithatë, në mesin e emrave më të mëdhenj të futbollit botëror spikat edhe një shqiptar. Me gola të shënuar në 6 turne të ndryshëm madhorë, Xherdan Shaqiri renditet mes lojtarëve më të suksesshëm në historinë e futbollit evropian në këtë aspekt.
Ylli me origjinë nga Gjilani, i cili përfaqëson kombëtaren e Zvicrës, ndan këtë arritje me dy emra të mëdhenj të futbollit gjerman, Jürgen Klinsmann dhe Miroslav Klose, ky i fundit rekordmen i golave në Kupat e Botës.
Prania e Shaqirit në këtë elitë dëshmon vazhdimësinë, talentin dhe ndikimin që ai ka pasur në skenën ndërkombëtare për më shumë se një dekadë. Arritja e tij bëhet edhe më e veçantë duke pasur parasysh se shumë emra të mëdhenj të futbollit nuk kanë arritur të regjistrojnë një statistikë të tillë.
Klasifikimi i lojtarëve evropianë që kanë shënuar në më shumë turne madhorë (EURO dhe Kupë Bote):
- 11 turne – Cristiano Ronaldo
- 6 turne – Xherdan Shaqiri, Jürgen Klinsmann, Miroslav Klose
Ndërsa rekordi i Ronaldos duket i vështirë për t’u arritur, fakti që një futbollist me origjinë shqiptare renditet mes emrave më të mëdhenj të historisë së futbollit mbetet një arsye krenarie për të gjithë shqiptarët.
Be First to Comment