Kryeministri Edi Rama ka publikuar në rrjetet sociale një mesazh që, sipas tij, i është dërguar nga një emigrant shqiptar me origjinë nga Vlora, i cili jeton dhe punon në Itali.
Në mesazhin e bërë publik, qytetari shpreh mbështetjen e tij për qeverinë dhe i kërkon Ramës të mos japë dorëheqjen, duke vlerësuar projektet zhvillimore të ndërmarra në vend.
Sipas tij, ndryshimet e viteve të fundit kanë bërë që shumë shqiptarë që jetojnë jashtë vendit të mendojnë për t’u rikthyer në Shqipëri për të jetuar dhe investuar.
Në vijim të mesazhit, emigranti ndalet edhe te protestat që po zhvillohen në Tiranë, duke shprehur mendimin e tij se ato nuk përfaqësojnë të gjithë qytetarët. Ai thekson se ka shumë njerëz që mbështesin projektet e qeverisë dhe nuk e shprehin publikisht qëndrimin e tyre.
Qytetari, i cili thotë se familja e tij është nga Vlora, shprehet se e mirëpret zhvillimin e projekteve në zonën e Zvërnecit dhe investimet e reja, duke i konsideruar ato si mundësi për zhvillimin ekonomik dhe krijimin e vendeve të punës.
Në fund të mesazhit, ai sugjeron që mazhoranca të ndryshojë mënyrën e komunikimit me qytetarët, duke argumentuar se kundërshtarët politikë përdorin mesazhe të thjeshta dhe emocionale që, sipas tij, ndikojnë lehtësisht në opinionin publik.
Mesazhi i publikuar nga kryeministri ka ngjallur reagime të shumta në rrjetet sociale, ku qytetarët kanë shprehur qëndrime të ndryshme lidhur me përmbajtjen e tij dhe me zhvillimet politike në vend.
Be First to Comment