Nga 1 korriku, rreth 550 mijë pensionistë në Shqipëri do të përfitojnë nga indeksimi i ri i pensioneve, një masë që synon të zbusë ndikimin e rritjes së vazhdueshme të çmimeve. Sipas vendimit, pensionet urbane do të rriten me 4%, ndërsa ato rurale me 5%.
Ekspertja e pensioneve, Armela Duka, shpjegoi se kjo rritje është një detyrim ligjor që zbatohet çdo vit dhe lidhet drejtpërdrejt me normën e inflacionit. Sipas saj, indeksimi synon të mbrojë fuqinë blerëse të pensionistëve përballë shtrenjtimit të produkteve dhe shërbimeve bazë.
Nga kjo skemë do të përfitojnë pensionistët e pleqërisë, ata të invaliditetit dhe përfituesit e pensioneve familjare. Edhe pse në vend numërohen rreth 754 mijë pensionistë, rritja do të prekë drejtpërdrejt rreth 550 mijë prej tyre.
Duka theksoi se diferenca mes pensioneve urbane dhe rurale vazhdon të mbetet, kryesisht për shkak të nivelit të kontributeve shoqërore ndër vite, veçanërisht në sektorin e bujqësisë, ku informaliteti ka qenë i lartë.
Sipas saj, indeksimi mund të ishte zbatuar më herët gjatë vitit për të lehtësuar më shpejt ndikimin e krizës së çmimeve, megjithatë ai mbetet një lajm pozitiv për pensionistët. Ajo vlerëson se rritja prej 4% dhe 5% do të përkthehet në një shtesë mujore prej rreth 500 deri në 800 lekë të reja, në varësi të kategorisë së pensionit.
Megjithëse kjo rritje sjell një lehtësim të pjesshëm, ekspertët theksojnë se kostoja e lartë e jetesës dhe shporta e shtrenjtë e konsumit vazhdojnë të jenë sfidat kryesore për pensionistët në Shqipëri.
Be First to Comment