Pas javësh kur protestën e kanë cilësuar si të ndikuar nga interesa politike, organizata, influencerë apo edhe aktorë të huaj, kryeministri Edi Rama ka shfaqur një qasje më të nuancuar. Në podcastin e tij “Flasim”, ai lexoi publikisht mesazhin e qytetarit Amos Mezuraj, i cili prej gjashtë vitesh kërkon zgjidhje për problemin e një pallati të dëmtuar nga tërmeti.
Rama pranoi se, nëse do të ishte në vendin e tij, “me shumë gjasa do të shkonte edhe vetë në protestë”, duke e konsideruar të drejtë zemërimin e qytetarëve që përballen me mungesë zgjidhjesh. Sipas tij, shumë prej protestuesve nuk dalin në rrugë për arsye politike apo ideologjike, por për shkak të problemeve të pazgjidhura dhe dështimeve të administratës për t’iu dhënë përgjigje.
Megjithatë, kryeministri vijoi të mbajë dallimin mes protestuesve dhe organizatorëve të protestave. Ai theksoi se ekzistojnë individë, organizata dhe madje edhe aktorë jashtë vendit që, sipas tij, përfitojnë nga zemërimi i qytetarëve dhe synojnë ta mbajnë gjallë konfliktin, në vend që të ndihmojnë në zgjidhjen e problemeve.
Deklaratat e tij përbëjnë një ndryshim të dukshëm në tonin e komunikimit, pasi për herë të parë ai pranoi më hapur se një pjesë e protestuesve kanë arsye reale për pakënaqësi dhe se përgjegjësia bie mbi institucionet që nuk kanë vepruar në kohë.
Letra e qytetarit
Në mesazhin e tij, Amos Mezuraj tregon se ai dhe 11 familje të tjera prej gjashtë vitesh enden në institucione të ndryshme pa gjetur zgjidhje për një pallat të dëmtuar nga tërmeti i vitit 2019. Ai shprehet se kanë ndjekur të gjitha rrugët ligjore dhe institucionale, por pa rezultat, duke theksuar se shpesh përgjigjet kanë qenë kontradiktore dhe premtimet nuk janë mbajtur.
Sipas tij, qytetarët shpesh ndihen të detyruar t’i drejtohen protestës pasi institucionet nuk japin zgjidhje konkrete, ndërsa burokracia e shumtë e ka bërë problemin të pazgjidhur për vite me radhë. Ai thekson gjithashtu kontrastin mes lejeve të shumta të ndërtimit dhe vështirësisë për të zgjidhur një rast të vetëm familjar.
Në fund të mesazhit, ai shpreh zhgënjimin dhe ndjesinë e pafuqisë, duke kërkuar që shteti të marrë përgjegjësinë dhe të mos i lërë qytetarët për vite të tëra pa përgjigje.
Be First to Comment