Tragjedi në Pakistan, autobusi bie në një përrua – të paktën 32 viktima dhe 16 të plagosur
Një aksident i rëndë rrugor ka tronditur Pakistanin, ku të paktën 32 persona humbën jetën dhe 16 të tjerë mbetën të plagosur pasi një autobus pasagjerësh doli nga rruga dhe ra në një përrua.
Ngjarja ndodhi mëngjesin e së premtes në zonën malore të Dana Sar, pranë kufirit mes provincave Balochistan dhe Khyber Pakhtunkhwa. Autobusi ishte nisur nga Quetta me destinacion Peshawarin kur, rreth orës 08:00 sipas kohës lokale, shoferi humbi kontrollin e mjetit.
Sipas autoriteteve, në autobus ndodheshin 48 pasagjerë, mes tyre gra dhe fëmijë. Bilanci paraprak flet për 32 viktima, ndërsa 16 persona të plagosur janë transportuar në spitalin e distriktit Zhob për të marrë ndihmën mjekësore.
Hetimet për shkaqet e aksidentit janë në vijim, por dyshimet e para tregojnë se një defekt në sistemin e drejtimit mund të ketë shkaktuar humbjen e kontrollit të autobusit.
Pamjet nga vendi i ngjarjes tregojnë mjetin të shkatërruar pothuajse plotësisht në fund të përroit, pasi kishte rënë nga një lartësi prej rreth 21 deri në 24 metrash.
Pas aksidentit, në zonë u angazhuan dhjetëra ekipe të emergjencës dhe ambulanca për operacionin e shpëtimit. Megjithatë, terreni i vështirë malor e bëri ndërhyrjen shumë më të ndërlikuar, duke penguar punën e ekipeve të kërkim-shpëtimit.
Be First to Comment