Një 46-vjeçar me shtetësi të Kosovës është paraqitur të martën para Gjykatës Penale në Vevey të Zvicrës, i akuzuar për vrasjen e partneres së tij 38-vjeçare në maj të vitit 2023.
Sipas Prokurorisë zvicerane, ai akuzohet për vrasje të rëndë, me pretendimin se e sulmoi partneren me disa goditje me thikë, nuk i dha ndihmë pasi e la të plagosur rëndë dhe u largua nga banesa së bashku me vajzën e tyre të vogël.
Ngjarja, sipas aktakuzës, ka ndodhur më 26 maj 2023 në banesën e viktimës në Vevey. I akuzuari, i cili jetonte në Gjermani dhe kishte një lidhje në distancë me partneren, kishte mbërritur në Zvicër dy ditë para krimit të dyshuar.
Prokuroria pretendon se, pas konflikteve të vazhdueshme mes çiftit, ai e sulmoi 38-vjeçaren me një armë të ndaluar që kombinonte një dorezë metalike me teh. Viktima pësoi plagë të rënda në qafë dhe kraharor, të cilat, sipas hetimeve, i shkaktuan vdekjen.
Sipas dosjes hetimore, pas sulmit ai nuk thirri shërbimet e emergjencës dhe nuk u përpoq t’i jepte ndihmën e parë. Hetuesit pretendojnë se ai mori telefonin e viktimës, mbylli banesën dhe u largua me vajzën e tyre, ndërsa 38-vjeçarja ishte ende gjallë. Më pas u nis drejt Thunit, ku u arrestua nga policia.
Nëse shpallet fajtor për akuzën e vrasjes së rëndë, 46-vjeçari rrezikon dënim deri në burgim të përjetshëm sipas ligjit zviceran.
Sipas prokurorisë, marrëdhënia e çiftit ishte përkeqësuar prej kohësh për shkak të xhelozisë, mosmarrëveshjeve familjare dhe konflikteve të vazhdueshme.
Në seancën e parë gjyqësore, e zhvilluar me përkthim në gjuhën shqipe, i akuzuari mohoi një pjesë të akuzave. Ai deklaroi se nuk kujtonte ta kishte goditur partneren disa herë me thikë, mohoi se marrëdhënia e tyre kishte qenë problematike dhe hodhi poshtë pretendimet se e kishte kërcënuar më parë me vdekje.
Sipas mediave zvicerane, gjatë marrjes në pyetje ai dha disa përgjigje kontradiktore. Procesi gjyqësor pritet të vazhdojë me paraqitjen e argumenteve përfundimtare të palëve.
Be First to Comment