Raportime: Rama shqyrton disa skenarë, nga riformatimi i qeverisë deri te mundësia e dorëheqjes
Sipas raportimeve të publikuara nga gazeta “SOT”, kryeministri Edi Rama po shqyrton disa skenarë politikë për të përballuar situatën e krijuar në vend. Burime të cituara nga kjo media pretendojnë se mes opsioneve të diskutuara janë një riformatim i qeverisë gjatë korrikut ose në fillim të shtatorit, si edhe mundësia e dorëheqjes nga posti i kryeministrit, me emërimin e një figure tjetër nga radhët e Partisë Socialiste.
Po sipas këtyre pretendimeve, Rama synon të ulë tensionet politike dhe të fitojë kohë përballë presionit të opozitës dhe protestave të zhvilluara javët e fundit. Nuk ka pasur deri tani një konfirmim zyrtar nga Kryeministria për këto skenarë.
Ndërkohë, protestat kundër qeverisë kanë vijuar për më shumë se një muaj. Ato nisën si kundërshtim ndaj projektit të resortit në Zvërnec dhe Sazan, por më pas u zgjeruan duke përfshirë kërkesa që lidhen me korrupsionin, qeverisjen, emigracionin dhe çështje të tjera sociale.
Nga ana tjetër, kryeministri Edi Rama ka mbrojtur masat e fundit të qeverisë, duke theksuar bonuset për pensionistët, rritjen e mbështetjes për personat me aftësi të kufizuara, fondet shtesë për medikamentet e pacientëve me kancer dhe rritjen e pagave për mjekët e urgjencës. Sipas tij, këto masa janë bërë të mundura falë performancës së ekonomisë dhe synojnë të mbështesin shtresat më në nevojë.
Rama është shprehur gjithashtu se qeveria po ndjek me vëmendje protestat, duke dalluar mes qytetarëve që, sipas tij, kanë shqetësime reale dhe elementëve që ai i konsideron të motivuar politikisht.
Be First to Comment