Ndryshim në Kryeministri: Vali Bizhga largohet nga posti, ja kush pritet ta zëvendësojë
Pas një angazhimi shumëvjeçar në krah të kryeministrit Edi Rama, Vali Bizhga ka dhënë dorëheqjen nga detyra e shefes së kabinetit të Kryeministrit, duke mbyllur një kapitull të rëndësishëm në administratën qeveritare.
Bizhga ka qenë një nga bashkëpunëtoret më të afërta të Ramës që prej kohës kur ai drejtonte Bashkinë e Tiranës. Gjatë viteve, ajo ka pasur një rol të rëndësishëm në koordinimin e punës së kabinetit, edhe pse ka preferuar të qëndrojë larg vëmendjes publike.
Sipas burimeve pranë qeverisë, vendimi për t’u larguar lidhet me arsye shëndetësore, të cilat e kanë bërë të pamundur vijimin e angazhimeve intensive që kërkon ky funksion.
Largimi i saj ka nxitur menjëherë diskutime për emrin që do të marrë drejtimin e kabinetit të Kryeministrit. Sipas raportimeve, në këtë detyrë pritet të emërohet Vilma Premti, e cila së fundmi ka shërbyer si shefe e kabinetit të kryetares së Gjykatës Kushtetuese.
Premti njihet si një profesioniste me përvojë në administratën publike dhe në sistemin e drejtësisë. Emërimi i saj pritet të zyrtarizohet në ditët në vijim, duke siguruar vazhdimësinë e punës në një nga pozicionet më të rëndësishme administrative të ekzekutivit.
Me këtë ndryshim, Kryeministria hyn në një fazë të re organizimi, ndërsa pritet të shihet se si do të vijojë puna e kabinetit nën drejtimin e shefes së re.
Be First to Comment