Një debat i tensionuar ka përfshirë mbledhjen e Këshillit Kombëtar të Partisë Demokratike, duke sjellë ndërprerjen e përkohshme të seancës dhe të transmetimit live nga selia blu.
Përplasja nisi pas kërkesës së anëtares së Këshillit Kombëtar, Ilirjana Kuçana, e cila kërkoi që në rendin e ditës të përfshihej një rezolutë që, sipas saj, ishte dorëzuar 24 orë përpara mbledhjes, në përputhje me statutin e PD-së.
Kryetarja e Këshillit Kombëtar, Julia Emiri, deklaroi se mbledhja kishte një rend dite të përcaktuar dhe se dokumenti i paraqitur nga Kuçana nuk mund të shqyrtohej në atë seancë.
Në debat ndërhyri edhe kryetari i PD-së, Sali Berisha, i cili iu referua dispozitave statutore, duke argumentuar se kërkesa nuk mund të merrej në shqyrtim në atë moment.
Diskutimi mes Berishës dhe Kuçanës u shoqërua me replika të forta për disa minuta. Gjatë përplasjes, Berisha u shpreh: “Nuk mund ta shkruajmë statutin këtu.”
Pas këtij momenti, transmetimi live nga selia e PD-së u ndërpre për disa çaste dhe mbledhja u pezullua përkohësisht.
Be First to Comment