Rama sqaron “Paketën e Maleve”: Nuk është projekt për oligarkët apo të huajt

Rama shpjegon “Paketën e Maleve”: Sipas tij, ligji nuk favorizon oligarkët apo investitorët e huaj

Kryeministri Edi Rama ka publikuar një tjetër reagim në rrjetet sociale lidhur me “Paketën e Maleve”, një nismë që ka shkaktuar debate dhe kundërshtime gjatë ditëve të fundit.

Këtë herë, kreu i qeverisë ka sjellë një shpjegim të ligjit përmes një analize të përgatitur nga ChatGPT, ku pretendohet se “Paketa e Maleve” nuk është hartuar për oligarkët, të huajt apo investitorët e mëdhenj.

Sipas këtij shpjegimi, ligji synon të zgjidhë problemet e familjeve që prej vitesh përdorin toka të trashëguara, por nuk kanë dokumente të plota pronësie për shkak të historisë së ndërlikuar të pronave në Shqipëri.

Në postimin e tij, Rama kundërshton akuzat se kjo nismë favorizon interesa private, duke argumentuar se kushti kryesor i ligjit është posedimi faktik i tokës për një periudhë të gjatë dhe përmbushja e kritereve ligjore.

Sipas tij, një investitor i huaj apo një person me kapital të madh nuk mund të përfitojë automatikisht nga kjo paketë, pasi duhet të plotësohen kërkesat për posedimin, verifikimin ligjor dhe realizimin e një projekti të miratuar.

Rama thekson se qëllimi i “Paketës së Maleve” është zhvillimi i zonave malore përmes agroturizmit, bujtinave, fermave, punishteve artizanale, përpunimit të produkteve vendase dhe aktiviteteve turistike.

Ai kundërshton gjithashtu pretendimet se toka po falet, duke deklaruar se përfituesit duhet të kalojnë një proces verifikimi dhe të përmbushin detyrimet e përcaktuara në kontratë.

Sipas kryeministrit, kjo nismë synon të kthejë pronat e pashfrytëzuara në burime ekonomike, duke krijuar mundësi punësimi dhe zhvillimi për komunitetet malore.

“Paketa e Maleve nuk është një ligj për ata që kanë shumë kapital, por për ata që kanë pasur tokë, punë dhe rrënjë, por nuk kanë pasur një titull të qartë juridik pronësie”, thuhet në argumentimin e publikuar nga Rama.