Anëtarët e Gjykatës Penale Ndërkombëtare (GjPN) kanë votuar për shkarkimin e kryeprokurorit Karim Khan, pas akuzave për sjellje të papërshtatshme seksuale.
Sipas BBC-së, vendimi për largimin e tij nga detyra u miratua me 82 vota pro, pasi Khan ishte pezulluar nga posti muajin e kaluar.
Organi mbikëqyrës i GjPN-së ka arritur në përfundimin se Khan ka kryer shkelje të rënda të detyrës dhe sjellje të papërshtatshme. Ai akuzohet për një marrëdhënie seksuale me një punonjëse më të re të gjykatës, si dhe për përpjekje për të ndikuar në procesin e ankesës së saj.
Khan ka mohuar vazhdimisht akuzat ndaj tij, ndërsa avokatët e tij e kanë kundërshtuar pezullimin, duke e cilësuar atë si “të paligjshëm, proceduralisht të padrejtë dhe të pambështetur në prova”.
Juristi britanik ishte zgjedhur si prokurori i tretë i GjPN-së në vitin 2021. Ai ishte larguar përkohësisht nga detyra që prej majit të vitit 2025, me qëllim që të përballej me hetimet dhe akuzat e ngritura ndaj tij.
Gjithashtu, atij i është pezulluar përkohësisht e drejta për të ushtruar profesionin e avokatit në Mbretërinë e Bashkuar, ndërsa autoritetet vijojnë hetimet për çështjen.
Be First to Comment