Dueli i së shtunës mbrëma mes Anthony Joshuas dhe Kristian Prengës ka shkaktuar debat të madh në botën e boksit, pasi disa figura publike dhe tifozë kanë ngritur dyshime për mënyrën se si ndryshoi rrjedha e ndeshjes.
Ish-pronari i Crystal Palace dhe komentatori i talkSPORT, Simon Jordan, ishte ndër të parët që shprehu skepticizmin e tij. Sipas tij, ndryshimi i paraqitjes së Prengës nga raundi i parë në të dytin ishte i pazakontë dhe meriton diskutim.
Në fillim të përballjes, Prenga dominoi me agresivitet. Ai e rrëzoi Joshuan dy herë në raundin e parë me goditje të fuqishme, duke e vendosur ish-kampionin e botës në një situatë shumë të vështirë.
Por në raundin e dytë dinamika e meçit ndryshoi plotësisht. Prenga uli ritmin e sulmeve, ndërsa Joshua përfitoi nga momenti për t’u rikuperuar dhe e mbylli duelin me një nokaut spektakolar.
Pas ndeshjes, Jordan shkroi në rrjetet sociale se i dukej e pazakontë mënyra se si ndryshoi zhvillimi i meçit, duke lënë të kuptohet se kishte dyshime mbi atë që ndodhi në ring. Ai tha se nuk i dukej normale që Joshua, pasi u rrëzua dy herë, të merrte papritur kontrollin e plotë të ndeshjes, ndërsa Prenga të shfaqej krejt ndryshe në raundin e dytë.
Edhe statistikat e CompuBox tregojnë një rënie të ndjeshme të aktivitetit të Prengës. Në raundin e parë ai tentoi 46 goditje dhe realizoi 13 prej tyre, ndërsa në raundin e dytë provoi vetëm 17 goditje, me vetëm tri të sakta.
Komentet e Jordanit u pasuan nga reagime të shumta në rrjetet sociale, ku edhe disa tifozë shprehën dyshime për ndryshimin e menjëhershëm të ritmit të boksierit shqiptar.
Megjithatë, deri në këtë moment nuk ekziston asnjë provë zyrtare apo hetim që të mbështesë pretendimet se ndeshja ishte e manipuluar. Dyshimet e ngritura mbeten opinione dhe spekulime, pa u konfirmuar nga autoritetet përkatëse të boksit.
Be First to Comment