Një dron i dyshuar, i pajisur me lëndë shpërthyese, është zbuluar pranë një avioni transporti ukrainas në aeroportin Leipzig/Halle në Gjermani, duke shkaktuar masa të menjëhershme sigurie dhe pezullimin e përkohshëm të fluturimeve gjatë natës.
Sipas raportimeve, pajisja u gjet pranë një avioni ukrainas të tipit “Antonov”. Droni kishte të bashkangjitur material shpërthyes dhe një detonator, por fatmirësisht shpërthimi nuk ndodhi, pasi mekanizmi i ndezjes rezultoi i dëmtuar.
Në vendngjarje ndërhyri një ekip i specializuar për çaktivizimin e bombave, i cili neutralizoi pajisjen pa incidente. Autoritetet gjermane kanë nisur hetimet për zbardhjen e plotë të ngjarjes, ndërsa sipas mediave, në proces janë përfshirë edhe ekspertë të NATO-s.
Aeroporti Leipzig/Halle, i konsideruar një nyje e rëndësishme logjistike për transportet drejt Ukrainës, qëndroi i mbyllur për trafikun ajror deri në orët e para të mëngjesit. Për pasojë, disa fluturime u vonuan, ndërsa një avion që vinte nga Mallorca u ul vetëm pasi operacionet u rikthyen në normalitet.
Nëse dëshironi të mbështesni punën e faqes sonë, mjafton të klikoni mbi foton më poshtë. Faleminderit për besimin dhe mbështetjen tuaj!