Konflikt familjar për pronën përfundon në përplasje fizike në Vorë – VIDEO
Një konflikt familjar, që dyshohet se lidhet me një mosmarrëveshje pronësie, ka përfunduar në përplasje fizike në Vorë. Si pasojë e incidentit, një grua raportohet se ka mbetur e lënduar dhe është dërguar për të marrë ndihmë mjekësore.
Ngjarja është denoncuar në redaksinë tonë nga një familjar, i cili ka dërguar edhe pamje filmike nga momentet e konfliktit.
Në video shfaqen dy burra dhe një grua pranë një banese. Sipas denoncuesit, dy burrat i kërkojnë gruas të largohet nga prona, duke pretenduar se ajo u përket atyre. Situata më pas përshkallëzohet dhe kthehet në një përplasje fizike.
Në pamje, gruaja shihet duke përfunduar në tokë dhe duke kërkuar ndihmë nga personi që po filmonte. Gjatë konfliktit dëgjohen edhe thirrjet e saj, ndërsa në një moment ajo pretendon se njëri prej personave i ka marrë telefonin.
Sipas denoncuesit, gruaja jeton në Gjermani dhe kishte ardhur në Shqipëri. Ai pretendon se ajo ka pësuar dëmtime gjatë përplasjes dhe më pas është transportuar në spital për trajtim.
Familjari thotë se konflikti lidhet me një mosmarrëveshje pronësie që, sipas tij, ka zgjatur prej rreth tre vitesh dhe është shoqëruar edhe me procese civile mes familjarëve.
Ai pretendon gjithashtu se më herët kanë pasur konflikte dhe kërcënime mes palëve dhe se, sipas tij, ndaj disa prej personave të përfshirë është në fuqi një urdhër mbrojtjeje.
Redaksia publikon pamjet e dërguara nga denoncuesi, ndërsa pretendimet e bëra prej tij mbeten për t’u verifikuar. Pritet gjithashtu një reagim nga personat e përfshirë dhe autoritetet kompetente për të sqaruar rrethanat e plota të ngjarjes dhe nëse janë marrë masa ligjore.
VIDEO: