Rama nis “sprintin” politik në Pogradec, në shtator priten vendime të rëndësishme për qeverinë
Fundi i gushtit po shoqërohet me lëvizje të rëndësishme brenda Partisë Socialiste, ndërsa Edi Rama po përgatitet për nisjen e një sesioni të ri politik. Në fokus pritet të jenë performanca e qeverisë, organizimi i PS-së dhe përgatitjet për zgjedhjet lokale të vitit 2027.
Sipas burimeve nga Partia Socialiste, këtë fundjavë në Pogradec pritet të zhvillohen disa takime të rëndësishme. Në një prej tyre do të marrin pjesë drejtuesit politikë të qarqeve dhe kryetarët socialistë të komisioneve parlamentare.
Në qendër të diskutimeve pritet të jenë dokumentet “Besa” dhe “Prania e Besës”, të cilat i janë dorëzuar grupit parlamentar socialist në fund të korrikut. Nga takimi pritet të dalin reflektime dhe propozime që mund të shërbejnë për hartimin e një dokumenti përfundimtar të partisë.
Një tjetër temë e rëndësishme do të jetë përgatitja për zgjedhjet lokale të vitit 2027, ndërsa socialistët pritet të analizojnë edhe situatën politike në qarqe.
Ministrat do të raportojnë për performancën
Pogradeci do të jetë gjithashtu vendi ku qeveria do të zhvillojë mbledhjen informale të njohur si “retreat”. Ministrat dhe drejtuesit e agjencive do të raportojnë për punën e bërë gjatë periudhës janar-gusht 2026.
Ndryshe nga takimet e mëparshme, këtë herë nuk pritet të marrin pjesë zëvendësministrat. Secili ministër do të prezantojë rezultatet e dikasterit që drejton, ndërsa në vlerësim do të përfshihen edhe komunikimi publik, prezenca mediatike dhe aktiviteti në rrjetet sociale.
Pas diskutimeve të ditës, drejtuesit socialistë dhe ministrat pritet të zhvillojnë edhe një darkë së bashku.
Shtatori mund të sjellë ndryshime në qeveri
Sytë janë tashmë edhe te java e parë e shtatorit, kur sipas burimeve të PS-së pritet të mblidhet Asambleja Kombëtare Socialiste.
Mbledhjet e mëparshme të Asamblesë janë përdorur nga Edi Rama edhe për të paralajmëruar apo prezantuar ndryshime në kabinetin qeveritar. Për këtë arsye, në PS ka nisur diskutimi nëse edhe këtë herë mund të ketë lëvizje në qeveri.
Një nga skenarët që po qarkullon është ai i ndryshimit të drejtimit të disa ministrive, me mundësinë që të preken deri në 6 dikastere.
Megjithatë, vendimi final mbetet në dorë të kryeministrit. Takimet e Pogradecit dhe analiza e performancës së ministrave pritet të japin sinjalet e para për atë që mund të ndodhë në shtator.
Numërimi mbrapsht ka nisur dhe vëmendja brenda PS-së është përqendruar te vendimet që mund të marrë Rama për kabinetin qeveritar.