Berisha flet për udhëtimin drejt SHBA-së: A është hequr “Non Grata”?
Kryetari i Partisë Demokratike, Sali Berisha, ka komentuar mundësinë e një udhëtimi të ardhshëm drejt Shteteve të Bashkuara të Amerikës, duke bërë të ditur se mund të shkojë atje në kuadër të një konference.
Berisha u shpreh gjithashtu pozitivisht për ambasadorin e ri amerikan në Shqipëri, Eric Wendt, duke vlerësuar eksperiencën e tij.
I pyetur nëse planifikon të udhëtojë së shpejti drejt SHBA-së, Berisha deklaroi se do të njoftojë publikun në rast se do të ketë një udhëtim të tillë.
“Me ato që unë kam lexuar, kam mendim shumë pozitiv për ambasadorin. Një njeri me një eksperiencë të gjerë. Mendimi im është tërësisht pozitiv. Natyrisht, siç kam thënë, unë do të shkoj në SHBA më së shumti me rastin e ndonjë konference dhe do t’ju njoftoj”, u shpreh Berisha.
Po çfarë ndodh me statusin “Non Grata”?
Deri në këtë moment, nuk ka një njoftim zyrtar nga Departamenti Amerikan i Shtetit apo Ambasada e SHBA-së në Tiranë që të konfirmojë ndryshimin apo heqjen e statusit të shpallur ndaj Sali Berishës.
Ndërkohë, raportime të ndryshme kanë hedhur pretendimin se mund të bëhet fjalë për një autorizim të veçantë dhe të përkohshëm për udhëtim në SHBA, dhe jo domosdoshmërisht për heqjen e plotë të statusit “Non Grata”.
Pra, deri në një konfirmim zyrtar nga autoritetet amerikane, statusi i Berishës mbetet i pakonfirmuar për ndonjë ndryshim.