Nxënësja gjen kuletën me para dhe dokumente në Prizren, e dorëzon në polici
Një nxënëse nga Prizreni ka treguar një akt të admirueshëm ndershmërie, pasi ka gjetur një kuletë me para dhe dokumente personale dhe e ka dorëzuar në polici.
Ngjarja ka ndodhur më 25 gusht 2026, rreth orës 20:45, në rrugën “Ekrem Rexha”. Nxënësja e Shkollës së Ekonomisë, O.T., e lindur në vitin 2011, e ka gjetur kuletën dhe, së bashku me prindin e saj, është paraqitur në Stacionin Policor të Trafikut në Prizren për ta dorëzuar atë.
Sipas Policisë së Kosovës, në kuletë ndodheshin para dhe dokumente personale. Përmes dokumenteve identifikuese, zyrtarët policorë kanë arritur të kontaktojnë pronarin.
Pas kontaktimit, pronari është paraqitur në stacionin policor dhe ka marrë kuletën e tij. Ai ka falënderuar nxënësen për gjestin e saj të ndershëm, si dhe Policinë e Kosovës për angazhimin në kthimin e sendeve të humbura.