Sipas të dhënave të fundit të publikuara nga World Air Quality Index, Tiranë po përballet me një situatë shqetësuese sa i përket ndotjes së ajrit, duke e kthyer atë në një rrezik real për shëndetin publik.
Matjet janë realizuar në disa nga zonat kryesore të qytetit, përfshirë Rrugën “Bardhyl”, Rrugën e Kavajës, ish-Parkun e Autobusëve dhe Rrugën “Papa Gjon Pali i Dytë”. Në të gjitha këto pika janë regjistruar nivele të larta ndotjeje, ku përqendrimi i grimcave të dëmshme ka arritur deri në 12 herë mbi kufijtë e rekomanduar nga Organizata Botërore e Shëndetësisë.
Zona më problematike rezulton të jetë Rruga “Bardhyl”, me një nivel prej 71 AQI, duke u renditur si pika më e ndotur në kryeqytet. Ndërkohë, stacioni “aqteam”, i vendosur pranë Fakultetit të Shkencave të Natyrës, paraqitet si një nga zonat me ajër më të pastër relativisht.
Pjesa më e madhe e stacioneve të monitorimit klasifikohen në nivelin “moderuar”, çka nënkupton se cilësia e ajrit nuk është optimale dhe mund të ketë efekte negative, sidomos tek fëmijët, të moshuarit dhe personat me probleme shëndetësore.
Ekspertët paralajmërojnë se ekspozimi i vazhdueshëm ndaj këtyre niveleve ndotjeje mund të ndikojë seriozisht në shëndet, duke prekur sistemin respirator dhe atë kardiovaskular, si dhe duke rritur rrezikun për sëmundje kronike.
Raporti thekson nevojën urgjente për ndërhyrje konkrete, përfshirë shtimin e hapësirave të gjelbra dhe masa efektive për reduktimin e ndotjes në Tiranë.