Drejtori i Departamentit për Rendin dhe Sigurinë Publike, Drejtuesi i Lartë Dhimitraq Ziu, ka bërë publike masat e reja që do të zbatohen në të gjithë vendin për monitorimin e qarkullimit rrugor dhe ndëshkimin e shkelësve.
Sipas Policisë së Shtetit, janë vënë në funksion 22 mjete të reja për matjen e shpejtësisë, ndërsa strukturat e Policisë Rrugore janë pajisur me dronë, kamera inteligjente, alkooltestues dhe drogëtestues për kontroll më të rreptë në akset kombëtare dhe zonat urbane.
Autoritetet sqarojnë se në rrugët nacionale patrullat nuk do të ndalojnë automjetet pa arsye, por shkeljet do të evidentohen përmes teknologjisë dhe gjobat do të regjistrohen në kohë reale në sistemin e-Albania. Ndërhyrja e menjëhershme do të bëhet vetëm në rastet e sjelljeve të rrezikshme, si parakalimet agresive, manovrat e gabuara apo shpejtësia ekstreme.
Në qytete do të vijojnë kontrollet intensive për përdorimin e alkoolit, shpejtësinë, përdorimin e celularit gjatë drejtimit, mosvendosjen e rripit të sigurimit dhe shkeljet ndaj këmbësorëve. Në fokus do të jenë edhe parkimet e gabuara, sidomos në korsitë e dedikuara.
Nga të dhënat e publikuara për 4-mujorin e vitit 2026 rezulton se:
- Mbi 1000 shoferë janë arrestuar për drejtim mjeti në gjendje të dehur ose pa leje drejtimi;
- 82 mijë drejtues janë ndëshkuar për tejkalim të shpejtësisë;
- 815 shoferë kanë humbur të gjitha pikët e patentës;
- Dhjetëra mijëra masa janë vendosur për parakalime të gabuara, përdorim celulari dhe mungesë të rripit të sigurimit.
Policia thekson se aksidentet më të rënda vijojnë të shkaktohen kryesisht nga shpejtësia dhe sjellja agresive në rrugë, ndërsa apelon që çdo drejtues mjeti të respektojë rregullat e qarkullimit për të shmangur tragjeditë.