Tragjedi në Siberi: Ariu sulmon çiftin në tendë dhe vret 29-vjeçaren
Një ngjarje tragjike ka ndodhur në malet Altai të Rusisë, ku një grua 29-vjeçare humbi jetën pas sulmit të një ariu të murrmë, vetëm një ditë pasi ishte fejuar.
Sipas raportimeve, Snezhana Korolyova dhe i fejuari i saj po qëndronin në një kamping në fshatin Artybash, në Siberinë jugore, kur rreth orës 01:00 një ari sulmoi tendën e tyre.
Çifti u zgjua nga zhurmat e krijuara nga kafsha, e cila depërtoi në tendë dhe më pas tërhoqi zvarrë 29-vjeçaren. Ariu e vrau gruan dhe më pas e çoi trupin e saj përtej lumit Biya.
Rojet e gjahut dhe policia tentuan ta largonin kafshën duke qëlluar në ajër, por nuk e vranë. Sipas dëshmitarëve, autoritetet u shprehën se kishte kufizime për përdorimin e armëve në zonën e banuar.
Një dëshmitare tregoi se ariu nuk e lëshonte viktimën dhe e tërhoqi atë përtej lumit. Ndërkohë, një tjetër banore e kampit tha se motra e saj u përball me të njëjtin ari atë natë dhe arriti të shpëtonte pasi një shofer ndërhyri me automjetin e tij dhe përdori dritat e përparme për ta trembur kafshën.
Mbetjet e 29-vjeçares u gjetën më vonë në zonën ku dyshohet se ariu e kishte varrosur trupin. Pas sulmit, kafsha u largua nga vendi.
Pas ngjarjes, në fshat u shpall gjendje e jashtëzakonshme për 10 ditë. Banorët kanë ngritur shqetësime për praninë gjithnjë e më të madhe të arinjve pranë zonave të banuara.
Një përfaqësues i shoqatës lokale të gjuetarëve dhe peshkatarëve deklaroi se shkurtimi i sezonit të gjuetisë mund të ketë ndikuar në rritjen e popullsisë së arinjve dhe afrimin e tyre drejt fshatrave.
Sipas banorëve, rreth 20 arinj lëvizin rregullisht në zonën përreth fshatit.