Kristian Prenga drejt sfidës së madhe me Anthony Joshuan: “Jam përgatitur maksimalisht për t’ju bërë krenarë”
Boksieri shqiptar Kristian Prenga ndodhet vetëm pak orë larg një prej përballjeve më të rëndësishme të karrierës së tij, pasi do të ngjitet në ring përballë ish-kampionit të botës në peshat e rënda, Anthony Joshua.
Para duelit që do të zhvillohet në Xhedah të Arabisë Saudite, Prenga ka përcjellë një mesazh për tifozët shqiptarë, duke i falënderuar për përkrahjen dhe duke premtuar se do të japë gjithçka nga vetja në këtë sfidë të madhe.
“Shqipe, ju përshëndes të gjithëve. Shpresoj të jeni mirë. Jam gati. Jam stërvitur shumë dhe kam punuar fort që t’ju bëj krenarë të gjithëve, si gjithmonë. Me Zotin përpara, shpresoj t’ju bëj krenarë edhe këtë herë”, u shpreh Prenga.
Përballja me Joshuan përfaqëson një mundësi të jashtëzakonshme për boksierin shqiptar, i cili do të ketë përballë një nga emrat më të njohur të boksit botëror. Një paraqitje e fortë ose një rezultat pozitiv ndaj britanikut do të shënonte një moment historik në karrierën e tij.
Prenga është përgatitur për muaj të tërë për këtë sfidë dhe ka deklaruar se do të hyjë në ring me motivimin maksimal, duke synuar të përfaqësojë denjësisht shqiptarët në arenën ndërkombëtare.
Të gjithë sytë tashmë janë te dueli i madh, ku mbetet për t’u parë nëse Kristian Prenga do të arrijë të befasojë Anthony Joshuan dhe të shkruajë një faqe të re në historinë e boksit shqiptar.
Be First to Comment