Rritja e çmimeve po shton shqetësimin për familjet shqiptare, ndërsa vëmendja është përqendruar te karburantet dhe ndikimi i tyre i mundshëm në pjesën tjetër të ekonomisë.
Çmimi i naftës ka arritur në 229 lekë për litër, duke bërë që qeveria të rikthejë në funksion Bordin e Transparencës për karburantet. Por presioni nuk kufizohet vetëm te nafta, pasi rritja e kostove të transportit dhe prodhimit mund të reflektohet edhe në çmimet e produkteve dhe shërbimeve të tjera.
Në disa vende të rajonit janë ndërmarrë masa për të kufizuar efektet e rritjes së çmimeve. Ndërkohë, në Shqipëri mbetet ende e hapur mundësia e një pakete të re mbështetëse për familjet dhe kategoritë në nevojë.
Ministrja e Ekonomisë, Delina Ibrahimaj, e pyetur në emisionin “E-Zone” nga gazetarja Rajmonda Lajthia, deklaroi se qeveria po e ndjek situatën në mënyrë të vazhdueshme dhe se çdo ndërhyrje do të varet nga zhvillimi i çmimeve.
Sipas saj, prioriteti duhet të jetë rritja e të ardhurave dhe ndërhyrja përmes mekanizmave të qëndrueshëm, ndërsa aktualisht inflacioni konsiderohet i kontrolluar.
Ibrahimaj solli si shembull krizën energjetike të disa viteve më parë, kur rritja e fortë e çmimeve detyroi qeverinë të ndërhynte me subvencione për kategoritë në nevojë.
Ministrja tha gjithashtu se gjatë këtij viti është evidentuar rritje e çmimeve të karburanteve, por sipas saj kjo nuk është reflektuar në të njëjtën masë te çmimet e produkteve ushqimore.
“Që kur filloi kriza në Lindjen e Mesme kemi bërë një monitorim të vazhdueshëm të çmimeve të konsumit dhe të karburanteve”, u shpreh Ibrahimaj.
Nëse rritja e çmimeve do të vijojë, mbetet për t’u parë nëse qeveria do të ndërmarrë masa të reja për të lehtësuar barrën mbi familjet dhe kategoritë më të ekspozuara.