Pavarësisht masave të ndërmarra nga qeveria gjermane për të frenuar rritjen e çmimeve të karburantit, tregu duket se ka marrë një tjetër drejtim. Në prag të festave të Pashkëve, çmimet e derivateve, veçanërisht të naftës, kanë arritur nivele rekord historike.
Sipas të dhënave të Klubit Gjerman të Automobilave (ADAC), çmimi mesatar i një litri naftë në Gjermani ka arritur në 2.32 euro, ndërsa në disa stacione ka kapur edhe shifrën alarmante prej 3 euro për litër. Edhe benzina ka shënuar një rekord të ri, duke arritur në 2.19 euro për litër. Këto nivele tejkalojnë rekordin e marsit 2022, kur çmimet u rritën ndjeshëm për shkak të luftës në Ukrainë.
Rritja e fortë e çmimeve erdhi vetëm një ditë pasi hynë në fuqi masat e reja të qeverisë, të cilat parashikojnë që stacionet e karburantit të mund të rrisin çmimet vetëm një herë në ditë, konkretisht në mesditë. Megjithatë, ADAC ka kritikuar ashpër këtë situatë, duke theksuar se, pavarësisht rënies së çmimeve të naftës bruto gjatë javës, çmimet në treg kanë vazhduar të rriten.
Sipas tyre, ekziston frika se kompanitë e naftës po rrisin çmimet në mënyrë të menjëhershme dhe drastike për të kompensuar kufizimet e reja. Kjo ka shtuar presionin mbi qeverinë gjermane, e cila po përballet me kritika për reagimin e saj ndaj kësaj krize energjetike.
Ndërkohë, në diskutim janë masa të reja për të lehtësuar barrën mbi qytetarët, përfshirë uljen e taksave mbi produktet energjetike dhe përfitime për udhëtimet me makinë, siç kanë vepruar edhe disa vende të tjera të Bashkimit Evropian.
Në të njëjtën kohë, situata ka ndikuar edhe në vendet fqinje. Polonia ka paralajmëruar se po monitoron zhvillimet në zonat kufitare, ku është vënë re një rritje e madhe e kërkesës dhe madje mungesa të karburantit, për shkak të fluksit të shoferëve gjermanë që kërkojnë çmime më të lira.
Përballë kësaj situate, ministri gjerman i Financave dhe zëvendëskancelari Lars Klingbeil ka kërkuar masa urgjente për të frenuar rritjen e çmimeve dhe për të përballuar presionin në rritje të inflacionit.