Europa po përballet me një valë të re tensioni pas deklaratave të forta që vijnë nga Irani, në një moment kur situata në Lindjen e Mesme po përshkallëzohet me ritme të shpejta.
Sipas raportimeve të mediave ndërkombëtare, presidenti francez Emmanuel Macron ka zhvilluar një bisedë telefonike me kryeministren italiane Giorgia Meloni, ku në qendër të diskutimit kanë qenë zhvillimet e fundit të sigurisë, pas sulmeve të ndërmarra nga Shtetet e Bashkuara dhe Izraeli ndaj Iranit.
Nga ana tjetër, Teherani ka lëshuar paralajmërime të qarta ndaj vendeve europiane. Autoritetet iraniane theksojnë se çdo qëndrim pasiv i Europës përballë asaj që ata e cilësojnë si shkelje të së drejtës ndërkombëtare nga SHBA dhe Izraeli, mund të sjellë pasoja që do të prekin gjithë kontinentin.
“Nëse Europa zgjedh të heshtë përballë këtij agresioni, atëherë të gjitha vendet do të përballen, herët a vonë, me pasojat,” thuhet në deklaratën e zyrtarëve iranianë.
Këto zhvillime kanë rritur ndjeshëm shqetësimin në kryeqytetet europiane, ndërsa liderët e Bashkimit Europian kanë intensifikuar kontaktet diplomatike në përpjekje për të parandaluar përhapjen e konfliktit përtej Lindjes së Mesme. Frika për një përshkallëzim më të gjerë ndërkombëtar mbetet e lartë, teksa përplasjet mes palëve vazhdojnë.