Kreu i Partisë Demokratike, Sali Berisha, gjatë një mbledhjeje të Grupit Parlamentar, paralajmëroi për një vendim të rëndësishëm që pritet të merret nga Gjykata e Lartë.
Sipas tij, kryetari i Gjykatës së Lartë, Sokol Sadushi, mund të shpallë një vendim që do të ndikojë drejtpërdrejt edhe te kryebashkiaku i Tiranës, Erion Veliaj, i cili ndodhet në paraburgim prej më shumë se një viti, pa një vendim përfundimtar.
Berisha u shpreh se ky vendim mund të ketë pasoja të gjera, duke pretenduar se përfitues nuk do të jenë vetëm persona në situata të ngjashme me Veliajn, por edhe individë të përfshirë në krimin e organizuar.
“Nesër do të dalë një vendim që prek të gjithë ata që janë në paraburgim pa vendim të prerë. Ky është vendimi për Veliajn, por nga ai përfitojnë edhe dhjetëra krerë të grupeve kriminale,” deklaroi Berisha.
Ndërkohë, procedura e nisur nga Sokol Sadushi lidhet me rishikimin e praktikës së njësuar të Gjykatës së Lartë për masat e sigurisë, e cila zbatohet që nga vendimi unifikues i vitit 2011.
Ky rishikim synon të kufizojë përdorimin e masës “arrest me burg” pa kritere të qarta dhe të sjellë ndryshime në mënyrën se si gjykatat vendosin për paraburgimin.
Zhvillimi konsiderohet i rëndësishëm për sistemin e drejtësisë, pasi mund të ndikojë drejtpërdrejt te të gjithë personat që ndodhen aktualisht në paraburgim pa një vendim të formës së prerë.