Artriti reumatoid është një sëmundje kronike inflamatore që prek kryesisht kyçet, por në raste të caktuara mund të ndikojë edhe në organe të tjera si zemra, mushkëritë, sytë dhe lëkura. Sëmundja karakterizohet nga periudha përkeqësimi dhe qetësimi, ndërsa simptomat më të zakonshme janë dhimbja, ënjtja dhe ngurtësimi i kyçeve.
Sipas specialistit të mjekësisë popullore Ylli Merja, problemet si artriti, borsiti, dhimbjet e mesit dhe disa çrregullime të tjera të sistemit kockor shoqërohen me procese inflamatore që ndikojnë në funksionimin normal të kyçeve dhe indeve përreth tyre.
Shenjat e para mund të përfshijnë lodhje të vazhdueshme, këputje trupore, temperaturë të lehtë, dhimbje të kyçeve dhe mungesë oreksi. Me kalimin e kohës, nëse gjendja nuk trajtohet, simptomat mund të përkeqësohen dhe të ndikojnë në lëvizshmërinë e pacientit.
Për diagnostikimin e sëmundjes rekomandohen analiza si faktori reumatoid, proteina C-reaktive, fibrinogjeni dhe niveli i acidit urik në gjak.
Sa i përket trajtimit, Merja thekson rëndësinë e përdorimit të bimëve mjekësore të kombinuara në formë çaji, të cilat synojnë të ndihmojnë qarkullimin e gjakut, të mbështesin funksionin e zemrës dhe të ndikojnë në uljen e nivelit të acidit urik. Gjithashtu, ai përmend lëvoren e shelgut dhe vajin e sinapit si preparate natyrale që përdoren për të mbështetur trajtimin dhe lehtësimin e shqetësimeve të lidhura me artritin.
Sipas tij, pacientët mund të vërejnë përmirësime të dukshme të simptomave brenda një periudhe relativisht të shkurtër kohe, në varësi të gjendjes individuale dhe ndjekjes së rregullt të trajtimit.