Politikani rus i opozitës Boris Nadezhdin është shoqëruar nga policia, vetëm disa javë pasi njoftoi kandidimin e tij për zgjedhjet parlamentare që pritet të mbahen në shtator.
Sipas mediave ndërkombëtare, Nadezhdin u mor nga banesa e tij dhe u dërgua në një komisariat në një qytet në perëndim të Moskës. Sekretari i tij për shtyp deklaroi se arsyeja e ndalimit nuk është bërë ende e ditur.
Pak ditë më parë, Ministria ruse e Drejtësisë e shpalli atë “agjent të huaj”, duke e akuzuar për përhapje të informacionit të rremë mbi qeverinë dhe për nxitje të pjesëmarrjes në tubime të paautorizuara.
Në fillim të vitit 2024, Nadezhdin u përpoq të kandidonte në zgjedhjet presidenciale me një platformë kundër luftës në Ukrainë. Ai deklaroi se synimi i tij ishte t’i jepte fund konfliktit dhe të rivendoste marrëdhëniet e Rusisë me vendet perëndimore.
Megjithatë, Komisioni Qendror i Zgjedhjeve në Rusi refuzoi kandidaturën e tij, duke argumentuar se një pjesë e konsiderueshme e nënshkrimeve të dorëzuara nuk ishin të vlefshme. Nadezhdin e kundërshtoi vendimin, por nuk arriti të marrë pjesë në garë.
Në zgjedhjet e marsit 2024, Vladimir Putin siguroi mandatin e pestë presidencial. Sipas ndryshimeve kushtetuese të miratuara në vitin 2020, ai mund të qëndrojë në pushtet deri në vitin 2036.
Aktualisht, opozita në Rusi përballet me kufizime të shumta, ndërsa shumë figura opozitare ndodhen në burg, në mërgim ose nuk janë më aktive në jetën politike.
Be First to Comment