ZHDUKET ISH-MINISTRI I RAMËS, SPAK NUK E GJEN NË BANESË
Teksa SPAK ka depozituar rekurs në Gjykatën e Lartë duke kërkuar rikthimin e tij në qeli, ish-ministri i Mjedisit, Lefter Koka, nuk është gjetur në adresën e tij të banimit.
Sipas një njoftimi publik të datës 17 prill, tentativa për ta njoftuar përmes postës ka dështuar, pasi dëftesa është kthyer mbrapsht me shënimin “larguar”.
Prokuroria e Posaçme kundërshton vendimin e shkurtit 2026 për lirimin e Kokës dhe kërkon që ai të rikthehet në burg, por vendndodhja e tij aktuale mbetet e panjohur.
Ajo që e bën edhe më misterioze situatën është fakti se, nëse nuk arrijnë ta lokalizojnë as autoritetet dhe shërbimet postare, dyshohet se ai mund të jetë larguar jashtë vendit, në një skenar të ngjashëm me raste të tjera të bujshme.
Kujtojmë se më 11 dhjetor 2025, GJKKO i hoqi masën “arrest me burg” për çështjen e inceneratorit të Fierit. Ndërkohë, kjo çështje është kthyer për rigjykim, por ende nuk është regjistruar në Apel, duke bërë që afatet e paraburgimit të përfundojnë në mungesë të një vendimi të formës së prerë.
Lefter Koka u arrestua në dhjetor 2021, i akuzuar për shpërdorim detyre, korrupsion dhe pastrim parash në lidhje me aferat e inceneratorëve. Sipas SPAK, vetëm për inceneratorin e Fierit janë paguar rreth 4 milionë euro për punë të pakryera, ndërsa dëmi në buxhetin e shtetit llogaritet në dhjetëra milionë lekë.
Në korrik 2025, ai përfitoi lirimin me kusht nga Gjykata e Durrësit për çështjen e inceneratorit të Elbasanit, ku ishte dënuar me 6 vite e 8 muaj burg. Ndërsa për dosjen e Tiranës, masa e sigurisë u shua pasi dënimi prej 2 vitesh u konsiderua i kryer përmes kohës së paraburgimit.