Pentagoni paralajmëron: “Sot dita më e zezë për Iranin!”
Shtetet e Bashkuara paralajmëruan një përshkallëzim të madh të operacioneve ushtarake kundër Iranit. Sekretari amerikan i Mbrojtjes, Pete Hegseth, deklaroi se dita e sotme do të jetë më intensive se çdo sulm tjetër që nga fillimi i luftës.
“Më shumë avionë, më shumë bombardues, më shumë goditje. Nuk do të ndalemi derisa armiku të mposhtet plotësisht,” tha Hegseth.
Gjenerali Dan Caine theksoi se mbi 5,000 objektiva ushtarake janë goditur që nga fillimi i konfliktit, duke shkatërruar bazat raketore, flotën detare dhe industrinë ushtarake të Iranit. Forcat amerikane përdorën dhjetëra bomba depërtuese 2,000 paundëshe për objektiva të vendosur thellë nën tokë.
Sipas Pentagonit, kapacitetet sulmuese të Iranit janë reduktuar ndjeshëm, ndërsa Teherani ndodhet i izoluar dhe nën presion të madh. Administrata amerikane lë të hapur mundësinë e negociatave, por çdo proces diplomatik do të varet nga kushtet që pranon Irani.
Konflikti ka hyrë në një fazë kritike, ndërsa komuniteti ndërkombëtar shqetësohet për pasojat rajonale dhe për tregjet globale të energjisë.