Një ngjarje e pazakontë dhe shqetësuese është regjistruar në zonën e Tales, në Lezhë, ku persona ende të paidentifikuar kanë tentuar të hapin një varr.
Rasti është zbuluar nga një 65-vjeçar me iniciale F. Gj., i cili ka konstatuar dëmtime në pllakat e betonit të varrit të nipit të tij. Menjëherë pas denoncimit, Komisariati i Policisë Lezhë ka referuar çështjen në Prokurori, ndërsa hetimet vijojnë për zbardhjen e plotë të ngjarjes.
Nga të dhënat paraprake, dyshohet se autorët kanë tentuar të depërtojnë në brendësi të varrit, vetëm pak muaj pas varrimit. Megjithatë, arkivoli i mbyllur hermetikisht ka bërë të pamundur realizimin e plotë të këtij veprimi.
Banorë të zonës shprehen se motivi mund të lidhet me grabitjen e sendeve me vlerë që mund të jenë vendosur pranë të ndjerit. Ngjarja ka shkaktuar reagime dhe shqetësim në komunitet, ndërsa autorët mbeten ende të paidentifikuar.
Be First to Comment