Familjarët e Flamur Kolmarkut, 55 vjeç, kanë ngritur alarmin për zhdukjen e tij, pasi prej ditës së djeshme kanë humbur çdo kontakt me të. Sipas të afërmve, ai ka shërbyer më herët në Gardën e Republikës dhe është larguar nga detyra rreth tre vite më parë.
Familja bën me dije se Kolmarku vuan nga demenca dhe probleme të theksuara të kujtesës, gjë që mund t’ia vështirësojë orientimin dhe ta vendosë në situata rreziku. Për shkak të gjendjes së tij shëndetësore, ekziston shqetësimi se ai mund të ketë humbur rrugën dhe të mos jetë në gjendje të kthehet vetë.
Sipas informacioneve mjekësore, në raste të tilla personat shpesh orientohen drejt vendeve ku kanë jetuar më herët. Për këtë arsye, familjarët dyshojnë se ai mund të jetë nisur në drejtim të zonave si Mamurrasi, Rubiku, Rrësheni ose Kurbneshi.
Mësohet se informacioni i fundit për vendndodhjen e tij e vendos atë në zonën e Bulqizës, në drejtim të Burrelit.
Të shqetësuar për sigurinë e tij, familjarët u bëjnë apel qytetarëve që nëse kanë parë Flamur Kolmarkun ose kanë ndonjë informacion për të, të kontaktojnë menjëherë në numrin: +355 68 206 5729. Ata kërkojnë gjithashtu shpërndarjen e njoftimit sa më gjerë, me shpresën që ai të gjendet sa më shpejt dhe të kthehet i sigurt pranë familjes së tij.