Një incident është regjistruar gjatë protestës së zhvilluar mbrëmjen e së dielës në Bulevardin “Dëshmorët e Kombit”, ku i përfshirë ka qenë gazetari i News24, Osman Stafa.
Sipas pamjeve të publikuara në rrjetet sociale, gazetari është parë duke u shoqëruar nga efektivët e policisë pas një debati të ndodhur gjatë protestës. Në video dëgjohet edhe një grua që shkëmben akuza dhe replika me të.
Burime nga vendngjarja bëjnë me dije se në komisariat është shoqëruar edhe gruaja e përfshirë në debat, ndërsa deri më tani nuk janë bërë të ditura zyrtarisht arsyet e shoqërimit të tyre.
Nga sa raportohet, mes palëve ka pasur një përplasje verbale, ndërsa gazetari ka deklaruar se nuk ka kryer asnjë veprim në kundërshtim me ligjin.
Gjatë protestës, Osman Stafa ishte gjithashtu një nga personat që mori fjalën në podium, duke bërë thirrje për pjesëmarrje më të gjerë në protestat e ardhshme.
Kujtojmë se Stafa njihet për publikimin e denoncimeve dhe raportimeve që lidhen me problematika të sistemit shëndetësor në Shqipëri, veçanërisht ato që kanë të bëjnë me Spitalin Onkologjik.