Mesazhi “Kosova është zemra e Serbisë” është shfaqur në fasadën e një ndërtese në zonën kryesore të këmbësorëve në Beograd, një zonë ku kalojnë çdo ditë mijëra turistë.
Ky slogan me përmbajtje nacionaliste, i cili mohon pavarësinë e Kosovës të shpallur në vitin 2008, ka zëvendësuar një grafit të mëparshëm që mohonte gjenocidin ndaj boshnjakëve në Srebrenicë. Ky i fundit ishte vendosur aty që nga qershori i vitit 2024 dhe ishte nënshkruar nga grupi ultradjathtist “Patrulla Popullore”.
Aktivistët e organizatës joqeveritare “KROKODIL” e kanë fshirë disa herë këtë grafit, por mesazhe të reja me përmbajtje nacionaliste janë rikthyer vazhdimisht në të njëjtin vend.
“Ata i vendosin këto grafite me qëllim përhapjen e propagandës, frikës, urrejtjes dhe nacionalizmit”, ka deklaruar për Radion Evropa e Lirë aktivisti Filip Jovanoviq, i cili ka marrë pjesë në rreth njëzet aksione të heqjes së tyre.
Be First to Comment