Ndahet nga jeta gjinekologu i parë shqiptar në Maqedoni, Dr. Ferit Vojnika
Një lajm i hidhur ka prekur komunitetin shqiptar këtë të enjte, pasi është ndarë nga jeta Dr. Ferit Vojnika, gjinekologu i parë shqiptar në Maqedoninë e Veriut dhe një nga figurat më të respektuara të mjekësisë shqiptare.
Lajmi për ndarjen e tij nga jeta është bërë i ditur përmes reagimeve të shumta në rrjetet sociale, ku familjarë, miq, kolegë dhe qytetarë kanë shprehur dhimbjen dhe vlerësimet për kontributin e tij të jashtëzakonshëm.
Gjatë karrierës së tij të gjatë, Dr. Vojnika dha një kontribut të çmuar në zhvillimin e mjekësisë shqiptare. Ai kreu studimet dhe specializimet në Shkup dhe Beograd, ndërsa shërbeu për disa vite në Gjakovë përpara se të kthehej në vendlindjen e tij, Dibër e Madhe, ku vijoi misionin e tij në shërbim të pacientëve.
I njohur për profesionalizmin dhe përkushtimin e tij, ai arriti të realizojë me sukses shumë ndërhyrje kirurgjikale në një kohë kur kushtet spitalore ishin të kufizuara dhe sfidat të shumta. Puna e tij la gjurmë të pashlyeshme në jetën e mijëra pacientëve dhe në historinë e mjekësisë shqiptare.
Përveç kontributit në fushën e mjekësisë, Dr. Ferit Vojnika la pas edhe një trashëgimi kulturore e historike përmes veprës së tij “Dibra nëpër urat e kohës”, ku dokumentoi ngjarje dhe sfida të rëndësishme të intelektualëve dibranë gjatë periudhave të vështira historike.
Me ndarjen e tij nga jeta, shqiptarët humbin një mjek të shquar, një intelektual të respektuar dhe një personalitet që ia kushtoi jetën profesionit dhe komunitetit të tij.