Çfarë mendojnë qytetarët për tradhtinë? A falet ajo dhe kush tradhton më shumë – femrat apo meshkujt? Këto ishin disa nga pyetjet që u drejtuan në rubrikën Vox Pop me Enkin në emisionin Ditë e Re në RTV Ora.
Përgjigjet e qytetarëve ishin të ndryshme. Disa mendojnë se femrat tradhtojnë më shumë, të tjerë besojnë se meshkujt janë më të prirur, ndërsa ka edhe nga ata që thonë se tradhtia nuk ka gjini.
Qytetari 1: “Femrat tradhtojnë më shumë. Unë nuk do ta falja tradhtinë.”
Qytetarja 2: “Më duket se femrat e kanë fajin.”
Qytetarja 3: “Të dy tradhtojnë njësoj.”
Por momenti më i habitshëm erdhi nga një çift i moshuar, i cili dha një përgjigje që tërhoqi vëmendjen e të gjithëve.
Gruaja pranoi se gjithmonë e kishte kuptuar tradhtinë e bashkëshortit, por kishte zgjedhur të heshtte për hir të familjes.
Bashkëshortja: “E kisha kuptuar që burri më tradhtonte, por bëja një sy qorr dhe një vesh shurdh sepse isha e re dhe kisha fëmijë.”
Ndërsa burri foli hapur, duke thënë se e kishte tradhtuar gjithmonë bashkëshorten.
Bashkëshorti: “E kam tradhtuar në çdo moshë. E tradhtoj sepse nuk m’i plotëson kushtet. Femra duhet të jetë më e vogël. Tani kam një të dashur 30 vite më të re, por është diçka kalimtare.”
Deklarata e tyre ka shkaktuar reagime të shumta, duke ndezur edhe një herë debatin: a falet tradhtia në një marrëdhënie?