Bordi i Transparencës ka publikuar çmimet e reja të karburanteve në Shqipëri, të cilat kanë hyrë në fuqi sot, më 17 qershor 2026, në orën 13:00. Këto çmime do të mbeten në fuqi deri në mbledhjen e ardhshme të bordit.
Sipas vendimit të fundit, çmimi maksimal i naftës (gazoil) për shitje me pakicë është caktuar në 176 lekë për litër, ndërsa për shitje me shumicë në 164 lekë për litër. Ndërkohë, benzina do të tregtohet me një çmim maksimal prej 166 lekësh për litër në pakicë dhe 154 lekësh për litër në shumicë.
Autoritetet kanë paralajmëruar operatorët e tregut se zbatimi i këtyre çmimeve është i detyrueshëm dhe çdo shkelje do të shoqërohet me masa ndëshkuese, deri në pezullimin e aktivitetit.
Bordi sqaroi gjithashtu se çmimet aktuale janë nën kufijtë e përcaktuar nga Akti Normativ nr. 1 i datës 3 prill 2026, çka nënkupton se akciza mbi karburantet do të vazhdojë të aplikohet në nivelin e plotë, 100%.
Për sektorin e peshkimit, çmimi i gazoilit është llogaritur në 81 lekë për litër, duke përfituar nga përjashtimet ligjore për taksën e qarkullimit, taksën e karbonit dhe akcizën.