Shpresa, një grua nga Puka e martuar në Shkodër, rrëfeu historinë e saj prekëse në rubrikën “Ka Një Mesazh Për Ty”, duke dëshmuar se dashuria dhe respekti në çift mund t’i rezistojnë kohës dhe sfidave të jetës.
Ajo tregoi se u njoh me bashkëshortin e saj, Samiun, kur jetonte në Pukë. Pas disa përpjekjeve të tij për t’i folur, Shpresa e drejtoi drejt familjes së saj, sipas zakoneve të kohës. Familjet ranë dakord dhe çifti u fejua, duke nisur një jetë të lumtur së bashku.
Duke kujtuar vitet e para të martesës, Shpresa tregoi se në vitet 1980, 1982 dhe 1984 solli në jetë tri vajza. Edhe pse Samiu ishte i lumtur me çdo fëmijë që vinte në familje, ajo e ndiente mungesën e një djali, pasi ishte rritur vetëm me motrat dhe kishte dëshiruar gjithmonë të kishte një vëlla.
Në vitin 1998, Shpresa mbeti sërish shtatzënë. Pa mundësinë për të mësuar gjininë e foshnjës përmes ekografisë, ajo priti me ankth ditën e lindjes. Më 11 maj të atij viti, dëshira e saj më e madhe u bë realitet: në jetë erdhi djali i shumëpritur.
Mes emocionesh, ajo kujtoi edhe një detaj të veçantë. Në të tre lindjet e vajzave, Samiu kishte shkuar ta vizitonte në maternitet me ushqime dhe përkujdesje. Por kur lindi djali, ai nuk arriti të shkonte menjëherë, pasi ishte mbushur aq shumë me gëzim nga lajmi, sa festonte lumturinë e madhe që kishte hyrë në familjen e tyre.