Niko Peleshi dënon dhunën gjatë protestave dhe bën thirrje për dialog: Të bashkohemi për Shqipërinë
Kryetari i Kuvendit të Shqipërisë, Niko Peleshi, ka reaguar lidhur me protestat e ditëve të fundit, duke dënuar aktet e dhunës dhe dëmtimin e pronës publike dhe private.
Përmes një postimi në Facebook, Peleshi theksoi se të rinjtë kanë të drejtë të kërkojnë më shumë mundësi dhe të ardhme më të mirë, të krahasueshme me atë të bashkëmoshatarëve të tyre në Bashkimin Evropian. Megjithatë, sipas tij, dhuna nuk mund të jetë mënyra për të shprehur pakënaqësitë apo për të kërkuar zgjidhje.
Ai nënvizoi se sulmet ndaj institucioneve dhe shkatërrimi i pronës nuk kanë lidhje me të drejtën e studentëve për të protestuar. Në mbështetje të qëndrimit të tij, Peleshi publikoi edhe deklaratën e Komisionit Evropian për protestat që po zhvillohen prej gjashtë ditësh në Tiranë.
Kreu i Kuvendit u bëri thirrje palëve që të ulen në tryezën e dialogut dhe të dëgjojnë njëra-tjetrën, duke paralajmëruar se kalimi i kohës mund ta vështirësojë edhe më shumë komunikimin.
Ai theksoi se, pavarësisht dallimeve dhe mospajtimeve, dialogu duhet të vazhdojë, duke kërkuar më shumë bashkëpunim dhe mirëkuptim në interes të vendit.
Në përfundim të mesazhit të tij, Peleshi apeloi për bashkim, duke e cilësuar Shqipërinë si qëllimin e përbashkët të të gjithëve.
Ndërkohë, Komisioni Evropian ka dënuar aktet e dhunës në Tiranë dhe në qytete të tjera të vendit, duke rikujtuar se liria e tubimit dhe e shprehjes janë të drejta themelore që duhet të ushtrohen në mënyrë paqësore.