Qeveria ka zyrtarizuar indeksimin e pensioneve me 2.7%, i cili do të nisë të zbatohet nga muaji korrik. Vendimi u mor më herët se zakonisht për shkak të rritjes së inflacionit, ndërsa autoritetet kanë paralajmëruar se në shtator do të prezantohet një reformë më e gjerë e skemës së pensioneve në bashkëpunim me Bankën Botërore.
Megjithatë, eksperti i ekonomisë Kujtim Hoxha e konsideron këtë rritje të pamjaftueshme, duke argumentuar se ndikimi real në të ardhurat e pensionistëve është minimal. Sipas tij, përfitimi mujor për shumë pensionistë përkthehet në rreth 60 lekë të reja në ditë, një shumë që, sipas tij, nuk arrin të kompensojë rritjen e kostos së jetesës.
Hoxha thekson se indeksimi duhej të ishte bërë që në muajin shkurt, pasi qytetarët kanë përballuar prej muajsh çmime më të larta për mallrat dhe shërbimet bazë. Ai shton se rreth 755 mijë pensionistë vijojnë të përballen me vështirësi ekonomike, ndërsa rritja aktuale nuk mbulon nevojat e tyre.
Eksperti ngre gjithashtu pikëpyetje mbi fondin prej 230 milionë eurosh, i cili ishte parashikuar si bonus pranvere në buxhetin e vitit 2026. Sipas tij, qeveria duhet të japë shpjegime se përse ky fond nuk u shpërnda dhe ku ndodhen aktualisht këto para.
Në të njëjtën kohë, Hoxha shprehet se vetë Banka Botërore e konsideron skemën aktuale të pensioneve si një sistem që ka nevojë për ndryshime të thella. Sipas tij, bonuset e deritanishme nuk zgjidhin problemet strukturore të pensionistëve, por shërbejnë vetëm si masa të përkohshme.
Ai kritikoi edhe deklaratat e ministres lidhur me indeksimin e lejeve të lindjes, duke theksuar se përfitimet e barrëlindjes janë përfitime afatshkurtra dhe, sipas legjislacionit të sigurimeve shoqërore, nuk janë objekt indeksimi. Gjithashtu, Hoxha ngriti shqetësimin për familjet shqiptare që sjellin në jetë fëmijë jashtë vendit, duke pretenduar se ato nuk përfitojnë bonuset e lindjes edhe pse i regjistrojnë fëmijët në gjendjen civile shqiptare.
Be First to Comment