Agjencia për Media dhe Informim pranë Kryeministrisë ka reaguar lidhur me pretendimet që po qarkullojnë në rrjetet sociale, sipas të cilave efektivë të Forcave të Armatosura janë përfshirë në protestën e sotme, të veshur me uniformat e Policisë së Shtetit.
Në deklaratën e saj, Agjencia i cilëson këto pretendime si të pavërteta, duke iu referuar qëndrimit zyrtar të Ministrisë së Mbrojtjes, e cila mohon kategorikisht përfshirjen e ushtarakëve në veprimtari policore me uniformën e policisë.
Sipas njoftimit, asnjë pjesëtar i Forcave të Armatosura nuk është angazhuar në detyra policore duke përdorur uniformën e Policisë së Shtetit. Ministria thekson gjithashtu se Forcat e Armatosura i ushtrojnë funksionet e tyre në përputhje me Kushtetutën dhe legjislacionin në fuqi.
Në përfundim të reagimit, qytetarëve u bëhet thirrje që të tregojnë kujdes me informacionet që shpërndajnë në rrjetet sociale dhe t’u referohen burimeve zyrtare për të shmangur përhapjen e lajmeve të paverifikuara.