Arrestohet i dyshuari për kanosjen e Vjosa Osmanit, Policia jep detaje
Policia e Kosovës ka arrestuar sot Beki Sylejmanin, i dyshuar për kanosjen e ish-presidentes së Kosovës, Vjosa Osmani.
Sipas raportimeve, i dyshuari dyshohet se kishte publikuar në rrjetin social Facebook një mesazh kërcënues ndaj Osmanit, ku ndër të tjera kishte shkruar: “Mendoj se atij që e shet pak vendin, plumbi i takon për ta mbajtur Albinin me popullin.”
Sipas raportit të Policisë së Kosovës, rasti është regjistruar në Prishtinë. I dyshuari është arrestuar dhe është intervistuar nga autoritetet.
Pas intervistimit, me vendim të prokurorit, ai është dërguar në mbajtje.
Policia ka bërë të ditur se personi dyshohet se ka kanosur përmes një rrjeti social një shtetase të Kosovës, ndërsa hetimet lidhur me rastin po vazhdojnë.
Autoritetet pritet të japin më shumë detaje lidhur me rastin dhe procedurat e mëtejshme ligjore.