Temperaturat kanë shënuar një rënie të ndjeshme gjatë ditës së djeshme, duke zbritur me rreth 6–7 gradë në orët e mesditës. Edhe mëngjesi i sotëm është karakterizuar nga freski e theksuar, ku në zonat verilindore termometri ka shënuar deri në 0°C. Megjithatë, gjatë ditës pritet një rritje e lehtë e temperaturave, me vlera maksimale që mund të arrijnë deri në 22–23°C në disa pjesë të vendit.
Gjatë fundjavës dhe në ditët në vijim, moti pritet të përmirësohet edhe më tej. Temperaturat do të vijojnë trendin rritës, duke arritur deri në 26°C në orët e mesditës. Pavarësisht kësaj, mëngjeset do të mbeten të freskëta, sidomos në zonat malore, ku minimumet do të luhaten rreth 4–5°C.
Sipas parashikimeve meteorologjike, pjesa e parë e muajit maj do të dominohet nga mot më i qëndrueshëm, me më shumë ditë me diell dhe temperatura në rritje. Megjithatë, duke qenë se jemi ende në stinën e pranverës, nuk përjashtohen reshje të izoluara dhe afatshkurtra, kryesisht në zonat veriore dhe lindore.