Një ngjarje tragjike është shënuar mesditën e së shtunës në Gjirokastër, ku një 62-vjeçar ka humbur jetën pasi dyshohet se është mbytur në liqenin e Viroit.
Viktima është identifikuar si Besnik Koka. Sipas informacioneve paraprake, ai është nxjerrë nga uji pa shenja jete, ndërsa në vendngjarje kanë mbërritur menjëherë shërbimet e policisë dhe grupi hetimor për të kryer veprimet procedurale.
Rrethanat e ngjarjes nuk janë bërë ende të qarta. Autoritetet po punojnë për të zbardhur shkaqet dhe dinamikën e plotë të rastit, si dhe për të përcaktuar nëse bëhet fjalë për një aksident apo për rrethana të tjera.
Kjo është viktima e tretë e raportuar gjatë ditës së sotme si pasojë e mbytjes në ujë. Më herët, në Plazhin e Tales, dy vajza të mitura u gjetën pa shenja jete, në një ngjarje që ka tronditur opinionin publik.
Ngjarja në liqenin e Viroit i shtohet bilancit të rëndë të kësaj dite, ndërsa hetimet vijojnë për të sqaruar plotësisht rrethanat që çuan në humbjen e jetës së 62-vjeçarit.