Një pushim familjar në ishullin spanjoll të Ibizës u shndërrua në një tragjedi, pasi një turist britanik humbi jetën në pishinën e hotelit ku ishte akomoduar.
Sipas mediave të huaja, ngjarja ndodhi në një hotel në zonën turistike Cala Tarida, në bregun perëndimor të ishullit. Turisti kishte përdorur rrëshqitësen e ujit, por pasi përfundoi zbritjen, nuk arriti të dilte më në sipërfaqe.
Në ato momente, bashkëshortja dhe vajza e tij ndodheshin pranë pishinës dhe dyshohet se panë të gjithë ngjarjen. Sapo u kuptua se ai ishte në vështirësi, stafi i hotelit dha alarmin dhe nisi menjëherë ndërhyrjen.
Punonjësit e hotelit i ofruan ndihmën e parë, duke kryer reanimim kardiopulmonar (CPR) dhe duke përdorur një defibrilator, pasi dyshohej se kishte pësuar arrest kardiak. Më pas në vendngjarje mbërritën edhe ekipet e emergjencës, të cilat vazhduan përpjekjet për ta rikthyer në jetë.
Megjithatë, pavarësisht ndërhyrjes së menjëhershme dhe përpjekjeve të vazhdueshme të mjekëve, turisti nuk mundi të mbijetonte dhe u shpall i vdekur.
Autoritetet spanjolle nuk kanë bërë ende publik identitetin e viktimës apo emrin e hotelit. Ndërkohë, policia ka nisur hetimet për të zbardhur plotësisht rrethanat e ngjarjes, ndërsa ekspertiza mjeko-ligjore pritet të përcaktojë shkakun e saktë të vdekjes.
Ngjarja ka tronditur familjarët e viktimës, si edhe pushuesit e tjerë të pranishëm në hotel, të cilët u bënë dëshmitarë të përpjekjeve për t’i shpëtuar jetën turistit.
Be First to Comment